ПЕТРОВЦИ - Концом 1950. року, точнєйше 27. децембра, основане КМД «Яким Гарди» и од теди Дружтво ношитель културней, уметнїцкей и просвитней роботи у Петровцох, а у початку и спортского покля нє основане спортске дружтво «Гвизда».
У тих шейдзешат пейц рокох остварело велїчезни успихи у промовованю рускей култури и язика. З поглядом на шицки тоти збуваня 2016. року наполнюю ше 97 роки од снованя першей културно-просвитней орґанизациї «Просвита» у Петровцох и шицких шлєдбенїкох по правох предходних ґенерацийох наших дїдох и оцох, мацерох и бабох.
Так и КУД «Яким Гарди» обовязани на святочни способ преславиц, нє лєм розвой
просвити, култури и уметносци, алє и националного идентитету, еманципациї и конституованя Руснацох Републики Горватскей.
Тогорочни цаловечарши Крачунски концерт КУД «Яким Гарди» зоз Петровцох отримал ше 27. децембра 2015. року з нагоди 65. рочнїци Дружтва у петровским Доме култури.
У полней сали патрачох наступели шицки секциї того Дружтва, од наймладших по найстарших аматерох зоз длугорочним искуством.
У богатим змисту двогодзинового концерту наступела хлопска жридлова шпивацка ґрупа, оркестер змоцнєни зоз членами КУД-а Руснацох зоз Осиєку, дзецинска шпивацка ґрупа, вокални солисти и танєчнїки.
Петровчанє и їх госци мали нагоду опатриц културну програму пошвецену Крачуну, а з нагоди 65. рочнїци Дружтва котре ноши назву Якима Гардия.
На смим початку предсидатель Дружтва Желько Костелник привитал шицких нащивительох и госцох, и повинчовал им Крачун и благословени крачунски швета. Зоз «Христос Раждаєтся, Славите Єго» розпочал концерт наших вредних аматерох хлопскей шпивацкей ґрупи, котри отворели програму зоз крачунску коляду «Вифлеєми новина».
Реферат з нагоди 65. рочнїци попровадзени зоз презентацию сликох пречитал и шицких присутних нащивительох и госцох упознал зоз роботу нашого Дружтва секретар Дружтва Владимир Дудаш.
Танцоше нєсцерплїво чекали же би ше представели своєй вирней публики и то зоз рускима народнима танцами под назву «Танцовала би я танєц та за танцом» пооблєкани до руских пасових сукньох зоз баршонями на глави. Младосц и краса танцошох и руского народного облєчива заблїщли ше на сцени попровадзени з аплаузом вирней публики.
Програму предлужели школяре ОШ А. Бауера, ПШ Петровци котри виучую мацерински язик зоз свою учительку Наталку Гнаткову. Радосц Крачуна указала и дзецинска шпивацка ґрупа зоз колядами «Пасли овци пастире» и « Пречистая дїва» зоз свою дириґентку Аню Грищук Гайдук. Зоз танцом «Три гвиздочки на нєбе» програму предлужели фолклораше виводзацкей ґрупи у руским облєчиве котру одтанцовали без гришки, а награда ушлїдзела зоз барз вельким кляпканьом у полней сали домашнїх и госцох котри нє пущли танцошох зоз сцени. Пришол шор знова на жридлову ґрупу шпивачох котри одшпивали крачунски коляди «Радуйтеся сви люди» и « Возвеселимся вси», а за тот час солисти ансамблу ше уж преблєкли до облєчива за хореоґрафичну миниятуру «Кумове» зоз котру одушевели патрачох, а у виводзеню солистох Ґ. Костелник, Б. Фетахи, Д. Гарди и солистки Тияни Мазур. Нєсподзиваносц бул и трио шпивачох Ивона Гнатко, Аня Грищук Гайдук и Михайло Голик котри одшпивали коляду «Циха ноц» у провадзеню Анї на клавиятурох, котра и увежбала шпивачох. Шпивацка ґрупа окрем руских одшпивала и горватску коляду «Радуйте се народи».
