ЗАҐРЕБ - Всоботу, 18 априла того року, Петровчанє и Осєчанє представели ше заґребскей публики. Повод госцованя була поволанка Представителя рускей националней меншини Городу Заґребу Иринея Мудруго, хтори обезпечел салу у «Ческей беседи» у Заґребе же би ше могло витвориц госцованє наших аматерох.
Сама програма почала на 19 годзин зоз привитним словом доброго домашнього, хтори присутним нащивительом представел предсидательку Союзу Русинох РГ Дубравку Рашлянин и дал єй слово. Предсидателька Союзу привитала домашнїх и виражела жаданє же бизме ше вецей стретали у менших, алє тиж так и у вельких центрох дзе жиєме и же бизме свойо одняли од забуца.
Петровске Дружтво ше заґребскей публики представелео на два способи. Так пред нащивителями успишно одбавени драмски аматерски фалат «Кров над главу», а сама ґлума була провадзена зоз щирима аплаузами публики и шмихом одоброваня. Драмска секция КУД «Яким Гарди» на тот способ потвердзела же дословно нєт простору на котрим ше нє може одбавиц єден таки фалат и же сцену годно прилагодзиц и простору хтори першенствено нє обдумани за драмски аматеризем.
У другей часци програми представела ше танєчна секция КУД «Яким Гарди» хтора одтанцовала даскельо танци зоз свойого рижнородного танєчного репертоару, а свою схопносц и талант указали и члени оркестру Дружтва, хтори одшпивали даскельо познати и облюбени руски писнї.
По законченю програми члени двох наших Дружтвох – осєцкого КД Руснацох и петровского КУД «Яким Гарди» грали и розвешельовали публику и шицких госцох на заєднїцким друженю. Атмосфера була нательо весела же ше чувствовал руски народни дух хтори ожил медзи бивателями велького городу як цо Заґреб.
