БЄЛОВАР - Под покровительством городу Бєловару, а у орґанизациї Ческей обец Бєловар, 28. новембра 2015. року у спортскей дворани отримана дзевята по шоре манифестация – «Вечар националних меншинох» на котрей по треци раз Руснацох представяло КУД «Яким Гарди» зоз Петровцох. Окрем же Петровчанє наступели зоз танцом «Опришки Олекси Доувбуша», члени Дружтва Таня Кренїцки и Боян Кошутич порихтали презентацию нашого народного облєчива и єдла, од чого визначуєме: капущанїки, садланїки, череґи и белюши. Тиж так, виложени були и Союзово виданя – Нова думка, Венчик, Руски народни писнї и други.

Нащивителє тей манифестациї пред початком програми могли уживац у деґустациї наших и других традицийних єдлох и у кратки час стол на котрим шицко було виложене остал празни, цо знак же ше им нашо национални єдла барз попачели, а кажде зоз нїх питал и рецепти же би дома зробели сами.

Того року у преполней спортскей сали понад 3 годзини програми уживали представителє локалней политичней елити и сами патраче. Спомедзи горватских и локалних представительох манифестациї, присуствовали и представителє амбасадох Ческей, Словацкей, Словениї и Мадярскей.

Програма розпочала зоз Гимну Републики Горватскей котру одшпивал хор Ческей обец зоз Бєловару, а нащивительом ше обрацели и привитали: Мирушка Лончар, предсидателька Ческей обец зоз Бєловару, Таня Новотни Ґолубич, заменїца жупана, Антун Корушец, городоначалнїк Бєловару и Александар Толнауер, предсидатель Совиту за национални меншини Републики Горватскей.

Конєчно почала и програма зоз наступом Ческей обец котра виведла венчик ческих писньох. У дефилеу зоз заставами ше представела кажда национална меншина и зоз єдну пару привитала присутних на своїм мацеринским язику «Добри вечар, витайце». Спред КУД «Яким Гарди» присутних привитали Денис Гарди и Тияна Мазур.

После дефилеу домашнїм и госцом манифестациї ше представели:

Бошняцка национална меншина – КУД «СЕВДАХ» Заґреб

Ческа национална меншина – ЧЕСКА ОБЕЦ – Бєловар

Мадярска национална меншина – МАДЯРСКА ЗАЄДНЇЦА Городу Бєловар

Нємецка национална меншина – ЗАЄДНЇЦА НЄМЦОХ У ГОРВАТСКЕЙ – ґрупа «Руде» Заґреб

Ромска национална меншина – КУД «ДАРДА» Дарда и ЗДРУЖЕНЄ РОМОХ Городу Бєловар

Руска национална меншина – КУД «Яким Гарди» Петровци

Русийска национална меншина – Здруженє русийскей бешеди у Меджимурю «КАЛИНКА» Чаковец

Словацка национална меншина – КУД «ИВАН БРНЇК СЛОВАК» Єлисавац

Словенска национална меншина – КПД «БАЗОВИЦА» Риєка

Сербска национална меншина – КД «ПРОСВЄТА» и «МОСЛАВИНА» Ґарешница

Українска национална меншина – КПД «УКРАЇНА» Славонски Брод

Окремни госци

ГФА «ТУРОПОЛЄ» Велика Ґорица

Мадярски ансамбл – Buzsáki boszorkány néptánc egyesület – танєчна чародїйна ґрупа босорки зоз буджаку – Мадярска

После програми додзелєни припознаня и шицки пошли на вечеру на котрей ше поупознавали и розменєли адреси за будуце сотруднїцтво.