ВУКОВАР - Того року з друку вишла збирка поезиї двох вуковарских авторох, панї Меланиї Пап и пана Звонимира Барни под назву “Дом у шерцу”. Же би ше тоту нєкаждодньову подїю презентовало ширшей явносци, а окреме домашнїм Вуковарчаньом, КУД “Осиф Костелник” у сотруднїцтве зоз Городску библиотеку Вуковар орґанизовал промоцию истей.
Промоция отримана 13. децембра 2014. року на 10. 00 годзин у просторе Городскей библиотеки Вуковар. По привитних словох боку Городскей библиотеки, промоцию водзела главна и одвичательна редакторка збирки Вера Павливич. Перше дала слово редакторки Любици Гаргай, хтора бешедовала о тим як кнїжка настала и о авторох же би их приблїжела потенциялним читачом. Потим Блаженка Будимчич, як рецензент кнїжки, бешедовала о написаному дїлу обидвох авторох, а Роберт Ерделї, хтори кнїжку збогацел зоз илустрациями, о тим як себе у глави стварял слику хтору по пречитаних стихох требал нарисовац. Тиж так слово мали и обидвойо авторе, хтори бешдовали о себе и о тим як їх твори през час наставали. Були пречитани дзешец писнї хтори друковани у кнїжки, а читали их Лїляна Киш, Любица Гаргай и Звонимир Барна. У музичней програми участвовал хор КУД “Осиф Костелник” з Вуковару хтори одшпивал три шпиванки.
Од визначних госцох на промоциї були присутни Звонко Костелник, член Совиту за национални меншини РГ, Златко Мезеї, предсидатель МО Пишкуревци, Владимир Маґоч, парох вуковарски, Яким Ерделї, предсидатель Ради рускей националней меншини Вуковарско-сримскей жупаниї, Агнетка Балатинац, Представителька рускей нациналней меншини городу Осиєку и Лела Дїтко, предсидателька Ради рускей нациналней меншини городу Вуковару.
Цала промоция прешла у барз емотивним духу, та ше з велїх очох скотуляла и подаєдна слиза. На остатку шицки присутни були задовольни, та предлужели друженє на скромним, алє смачним банкету.
Треба вшелїяк наглашиц же кнїжку видал Союз Русинох Републики Горватскей, а друкована є зоз финансийну потримовку Совиту за национални меншини Републики Горватскей.
Любица Гаргай
