ВУКОВАР - У орґанизациї КУД “Осиф Костелник” зоз Вуковару отримани 50. ювилейни бал, хтори ше трaдицийно отримує остатнєй соботи у януару мешацу. Так було и того року, та бал оримани 30. януара 2016. року з початком на 19 годзин.
На самим початку шицких присутих привитал предсидатель Дружтва, Владо Русин, а вец ше рушело зоз културно-уметнїцку програму. Окрем предсидателя, присутним прегварели и представителька Городу Вуковару Ана Живанович и Златко Мезеї, висланїк городоначалнїка зоз Дякова.
Медзи госцами були и Олександр Левченко, амбасадор України у Републики Горватскей, Иван Пенава, городоначалнїк Городу Вуковару, Лела Дїтко. предсидателька Ради рускей националней меншини Городу Вуковару, Звонко Костелник, член Совиту за национални меншини Републики Горватскей, Ана Живанович, прочалнїца Управного оддзелєня за дружтвени дїялносци, Марина Секулич, прочалнїца Управного оддзелєня за културу и туризем, Дубравка Рашлянин, предсидателька Союзу Русинох Републики Горватскей, Вера Павлович, редакторка руских виданьох при Союзу и Златко Мезеї, висланїк городоначалнїка городу Дякова и предсидатель приятельского КУД “Зора” зоз Пишкуревцох.
Културно-уметнїцку програму уж по традициї порихтали домашнї. Представели ше зоз пейцома шпиванками и трома танцами. Шпиваче дзецинскей шпивацкей секциї соло одшпивали три писнї. Кристиян Миклош одшпивал дзецинску шпиванку “Перше товаришство”, Михаил Ґрищук шпиванку “Панонска ровнїно”, а Клара Миклош “Любичица мала”. Мишани хор под руководзеньом Мариї Закалюк одшпивал два шпиванки, “Били орґони” и “Дай нам Боже добри час”. Шицки шпиванки провадзел оркестер Дружтва под ровнаньом Влади Русина. Ветеранє, танцоше Татяна Алерич и Зденко Бурчак на франтовлїви способ одтанцовали танєц “Буковински весильни” и то окреме за тот ювилей, а могли бизме го представиц зоз шлїдуюцима словами: “Танцуєме у Држтве штерацец роки бо нас єст хтори можеме, або думаме же можеме. ” Дзивоцка танєчна ґрупа за тоту нагоду одтанцовала два танци, “Козачок” и “Буковински танци”, а порихтала их водителька танєчней секциї Татяна Алерич. Же би тот ювилей звелїчали, за тоту нагоду поволални и госци КУД “Яким Гарди” зоз Петровцох. Їх танєчна секция за тоту нагоду одтанцовала танєц “Тацовала би я танєц та за танцом” у хореоґрафиї Звонка Костелника.
На балу були орґанизовани богата томбола и танєц шерца. Главни три награди були миксер, пейґла и бициґла. Бициґлу достала Клара Миклош, наймладша шпивачка домашнього Дружтва. У танцу шерца победзел пар Ирена Дюдяр и Мийо Шайтош. Вони як награду достали торту и вино. През цали вечар грали и шпивали госци зоз Руского Керестура.
И того року место отримованя була Святочна В&С сала на Саймишту. Було присутне красне число людзох, 250 особи и то нє лєм зоз Вуковару, алє и зоз других местох нашей держави як и зоз иножемства.
На балу зазначена и єдна окремна подїя, а слово о тим же почесни предсидатель КУД “Осиф Костелник” Михайло Панкович и його жена Анка того року преславели 50. роки малженстава, а мали и златну свадзбу. З тей нагоди Дружтво им подаровало вишиту винчованку положену до рамикох. Винчованку вишила Олена Поштич.
Любица Гаргай
