ОСИЄК - У орґанизациї КУД-а Руснацох Осиєк а з финанцийну потримовку Совиту за национални меншини РГ, всоботу, 25. октобра, у шветочней сали Обер Ланч Бару (Ober Lunch Bar), у Осиєку, отримана 4. манифестация «Ружа за Лелу».
Здогадуюци ше Лели Дїтко, хтора нас, после чежкей хороти, напущела у 58. року живота а чийо мено ноши тота манифестация, по уводних словох, на видео муре приказани слики з Лелового животу.
Потим, креативни секциї КУД-а «Яким Ґовля» з Миклошевцох, КУД-а «Осиф Костелник» з Вуковару и КУД-а Руснацох Осиєк, приступели вирабяню ружичкох, кажде на свой креативни способ.
Од виробених ружичкох формовани венєц опрез Леловей слики, як припознанє єй нєсебичней роботи у рускей заєднїци.
Под час вирабяня ружичкох, зашпивало ше руски шпиванки зоз провадзеньом тамбурашох зоз КУД-а "Осиф Костелник" и КУД-а Руснацох Осиєк. На тот способ ожило здогадованє на дакедишнї ПРАДКИ, барз популарну жимску забаву у прешлим вику.
Окремна радосц була же члени КУД-а "Яким Ґовля" приведли и младших членох, дзеци хтори барз спретно вирабяли свилени и паперово ружички.
За тот їх труд, КУД Руснацох Осиєк наградзело їх з окремним дарунком за ище векшу креативносц.
Друженє ше предлужело и коло смачней вечери, бо присутних хтори почали з роботню пополадню, уж залапела ноц, а добре розположенє присутних указало же отримованє креативних роботньох на хторих ше зашпива руски шпиванки и бешедує по руски, дава додатну вредносц очуваню идентитету и културного скарбу рускей заєднїци, чиї 200 фамелиї по налогу Мариї Терезиї, на тоти простори преселєни з Горнїх до Долнї крайох Габсбурскей монархиї скорей скоро 300 роки,точнєше 1751.року.
Агнетка Балатинац
