ВУКОВАР - У Вуковаре, у шедзиску Союзу Русинох РГ, 15. янура його екселенция Олександар Левченко, амбасдор України у РГ, нащивел нашо просториї. Сердечне стретнуце окрем водзацих у нашим Союзу, на чолє зоз предсидательку Союзу Русинох РГ Дубравку Рашлянин и тайомнїком Союзу и представительом Руснацох у Совиту за национални меншини Републики Горватскей, Звонком Костелником, зоз своїм присуством звекшали и предсидателє руских Радох Општини Боґдановци, Владимир Дудаш и Општини Томповци, Mирослав Лїкар, предсидателє наших КУД-ох зоз Вуковару и Винковцох и други зацикавени представителє явного и културного живота Руснацох у РГ.

По привитним слове предсидательки Союзу, Олександар Левченко вжал слово. На самим початку, понеже ше у Вуковаре находзел на сам дзень визначованя 18. рочнїци од мирней реинтеґрациї гораватского Подунавя, Олександер Левченко питал ше нашим представительом яке их думанє о терашнїм горуцим питаню як цо то хаснованє кирилици и двоязичних таблох и назвох у Вуковаре, а вец ше надовязал на актуални обставини у України и наглашел же у тим случаю нє може буц слово о зраженю писмох, понеже ше и Українци и Руси служа зоз истим писмом, т. є. зоз кирилицу, заш лєм можеме бешедовац о розличним погляду на швет, при чим Україна обрацена ґу заходу, а процивнїки ґу востоку.

Терашнї обставини у України, спарм словох амбасадора Левченка, компликовани, анї нє панує война, а анї анектовани териториї нє врацени под українску сувереносц у прoцесу имплементациї порадзеним у Минску. З медзинародну арбитражу би ше требало одлучиц чим скоршому врацаню окупираного Домбаску и анектованого Криму, же би ше могло далєй нєзавадзано фукционовац. На питанє присутних чи ше у самей України припаднїки русийскей националней меншини чувствую занєдзбано або обесправено, дал одвит же ше роботни и дружтвени обставини у других часцох держави нє пременєли за гражданох України, алє воєни обставини охудобнюю жем и требало би чим скорей присц до стабилного миру же би ше рушело напредок. На питанє чи медзи Україну и РГ през остатнї три роки пришло до роснуца медзидержавней економиї, одвит бул же ше у України першенствено муша ришиц политични обставини, а вец ше далєй може бешедовац о тарґовини и роснуцу медзисобного вивозу.

Вера Павлович