МИКЛОШЕВЦИ - Рочна виберанкова Скупштина КУД „Яким Ґовля“ Миклошевци отримана 21. фебруара у просториї старей тарґовини. На Скупштини були присутни 26 члени, як и госци: заменїки началнїкох Општини Томповци Здравко Звонарич и Мирослав Лїкар, предсидателька Союзу Русинох РГ Дубравка Рашлянин, представитель Руснацох у Совиту за национални меншини Звонко Костелник.
Предсидатель Дружтва Славко Ждиняк пречитал звит о роботи Дружтва за 2015. рок, як и финансийни звит. Медзи иншим, вон визначел же у Дружтве активно робя два фолклорни секциї, дзецинска (хтора мала 13 наступи) и младежска (9 наступи), рецитаторска (4 наступи) и Женска шпивацка ґрупа (16 наступи).
Єдна зоз точкох дньовного шора була пременка Статуту Дружтва. Предсидательство КУД „Яким Ґовля“ предложело зменшиц числох членох Предсидательства зоз тринац на дзевец членох, цо члени Дружтва єдногласно прилапели.
Розришене потерашнє Предсидательстао и Надпатраюци одбор и вибрани нови. До нового Предсидательства вибрани: Витомир Чордаш, Борис Бучко, Санела Поточки, Леся Мудри, Сузана Мудри, Виолета Гирйовати, Славко Ждиняк, Мирослав Колєсар и Славица Гайдук.
Надпатраюци одбор: Мария Филипович, Мария Папуґа и Яким Симунович.
Предсидательство отримало першу роботну схадзку на котрей за предсидателя вибрани Славко Ждиняк, подпредсидателя Леся Мудри, секретара Виолета Гирйовати, а за касира Санела Поточки.
