ВУКОВАР - Вуковарске здруженє Вуковарчанє добрей дзеки 28. новембра того року орґнизовало манифестацию под назву “Вуковарчанє Вуковарчаньом” хтора ше отримала у Горватским доме у Вуковаре. Програма започала на 19 годзин, а уход бул шлєбодни. Здруженє тоту манифестацию задумало так же би ше вуковарски дружва, здруженя и поєдинци своїм согражданом представели и розвешелєли их, а з нагоди наиходзацих крачунских и новорочних шветох.
У програми участвовали: Горватске културно-музичне дружтво ”Дунай”, Танєчна ґрупа “Венера”, КУД “Осиф Костелник”, Здруженє Нємцох и Австриянцох”, Вуковарске сербске шпивацке дружтво “Явор”, Желько Андабака, Денис Машич, Давор Бабич, Страхиня Падежанин и Сандра Югас, шицки зоз Вуковару и КУД “Яким Ґовля” зоз Миклошевцох.
КУД “Осиф Костелник” зоз Вуковару представело ше зоз двома шпиванками “Зрели, зрели червени ягоди” и “У градочки шалата”, а одшпивали их члени мишаного хору у провадзеню тамбурового оркестру. Водителька секциї Мария Закалюк.
Танєчна секция КУД “Яким Ґовля” зоз Миклошевцох одтанцовала два танци: ”Горнїцки танєц” и “На тарки”.
Вшелїяк треба надпомнуц же ше на самим початку як и на остатку манифестациї шицким присутним зоз пар словами обрацела предсидателька здруженя Вуковарчанє добрей дзеки, Лена Вртарич. Бешедовала о здруженю и його акцийох, а вшелїяк треба наглашиц же праве вони у Вуковаре потримали горватску акцию “Власи любови”. Обиходзели школи и зберали донацию власох за правенє парикох за дзеци хорих од малиґних хоротох. Тиж наглашела же перша особа зоз Вуковару хтора подаровала свойо власи у тей акциї бул хлоп.
Любица Гаргай
