ПЕТРОВЦИ - У дружтвеним доме Соколана у Петровцох, внєдзелю 7. фербруара того року отримани Дзенски бал на вельку радосц валалских дзецох, родичох, бабох и дїдох, як и госцох з боку котри ше пришли добре забавиц.
Як и потераз, за орґанизацию ше остарали члени Рускей ради Општини Боґдановци и КУД «Яким Гарди», як и даєдни жителє Петровцох хтори дзечнє пришли орґанизацийно помогнуц тоту подїю.
Богату томболу финансовала Руска рада зоз Петровцох и Ириней Мудри, Представитель Руснацох Городу Заґребу, а зоз скромним спонзорством зявело ше и подприємство за тарґовину зоз Петровцох «Кисиль д. о. о. » хторе подаровало томболи.
Цале нєдзельове пополадню шицким присутним грал тамбурови оркестер КУД «Яким Гарди», хтори з тей нагоди грал весели дзецински репертоар, а подїю звекшали и наступи дзецинскей шпивацкей ґрупи КУД-а под дириґованьом Анї Грищук Гайдук и школярох хтори виучую руски язик у подручней школи Петровци зоз учительку Наталию Гнатко, хтори нам одшпивали дзецински шпиванки. Вешелєли ше и числени дзеци у сали як кед би шицки були пред микрофонами, а на концу ушлїдзели и щири аплаузи.
Попри танцу, бавеня зоз балонами и забаву, дзеци єдво чекали вицагованє томболох бо кажде мало даяке власне жаднє цо би найволєло достац, а томболи було надосц, та даєдни достали и вецей награди. На обще нєсподзиванє, у под час вицагованя наявене же ше вицагню и два живи томболи хтори донирала длугорочна членїца Дружтва «Яким Гарди», а слово о двоїх щенятох хтори пожадали числени дзеци, а дому их однєсли двойо дзеци. Нєодлуга потим главну награду однєсла госцинска нащивителька Дзецинского балу хтора ше зоз Петровцох давно преселєла до Осиєку.
Орґанизаторе витворели свой циль, бо дзеци були розвешелєни и задовольни зоз порихтаним, та ше шицки назадваю предлужованю тей длугорочней традициї у орґанизованю Дзецинского балу у Петровцох.
Таня Гарди
