ОСИЄК - У орґанизациї КУД Руснацох Осиєк, 5. децембра 2015. року, у Осиєку отримани 11. «Дравски габи», стретунаца хорох и шпивацких ґрупох Руснацох Републики Горватскей. Наступели шейсц руски дружтва з Горватскей, Матица Словацка з Осиєку и єдно руске дружтво з иножемства.
З Горватскей наступели: КУД-о «Осиф Костелник» з Вуковару, КУД-о «Яким Гарди» з Петровцох, КУД-о «Яким Ґовля» з Миклошевцох, КД-о Руснацох з Винковцох, «Руснак» дружтво Руснацох у РГ та домашнї, КУД-о Руснацох Осиєк. З Войводини наступело КУД-о «Петро Кузмяк» з Нового Орахова.
Коло 150 учашнїкох и патрачох, мало нагоду послухац досяги наших хорох и шпивацких ґрупох а першираз того року, КУД-о Руснацох Осиєк презентовало новоосновану мини фолклорну секцию котра одтанцовала танєц «Черешенки» у кореоґрафиї Звонка Костелника а з провадзеньом тамбуровей орхестри и хору КУД-а Руснацох Осиєк.
Госцох и учашнїкох привитала предсидателька КУД-а Руснацох Осиєк Агнетка Балатинац а спред Координациї Руснацох РГ бешедовал предсидатель, Борис Бучко. Спред Союзу Руснацох РГ, присутних привитала предсидателька Дубравка Рашлянин, док манифестацию отворела подпредсидателька Совиту за национални меншини РГ, Рената Тришлер.
Попри висланїкох дружтвеного, политично и вирского животу з Републики Горватскей, «Дравским габом» присуствовала и делеґация Националного совиту Руснацох Сербиї:, Желько Ковач и Йовґен Мудри.
Стретнуца ше отримали з финанцийну потримовку Совиту за национални меншини РГ, Осиєцко-бараньскей жупаниї и городу Осиєку.
З продуктами своїх подприємствох, манифестацию подопарли: Пивовара Осиєк, Ямница д. д., Пекарство Кадуля та подприємство Биєлич Цо.
Агнетка Балатинац
