ОСИЄК - КУД Руснацох Осиєк 9. януара отримало порядну Рочну звитну скупштину за 2015. рок. Пре нови закон о здруженьох, то остатнї рок же ше звитни лєбо виберанково скупштини отримую початком нового рока, а приказую звит о роботи у року скорей того. По новим закону о здруженьох, звити о роботи буду мушиц будз приказани у чечуцим року.

Звит о роботи КУД-а Руснацох Осиєк поднєсла предсидателька КУД-а, Агнетка Балатинац, а финансийни звит касирка, Лела Дїтко.

У звиту о роботи Дружтва предсидателька начишлєла наступи котри мала кажда зоз секцийох Дружтва, а наглашела же у 2015. року основана фолклорна секция котра истого року мала замерковани наступи на даскелїх манифестацийох. Найактивнєйши бул тамбурови оркестер котри медзи иншим помагал при наступох КУД-а «Яким Гарди» з Петровцох и КУД-а «Осиф Костелник» з Вуковару.

Вкупно, КУД Руснацох Осиєк мало 21 наступ през хорску, тамбурову, фолклорну и подобово-етно секцию.

Дружтво орґанизовало и свою традицийну манифестацию «Дравски габи», як и Подобову колонию на котрей перши раз були млади руски маляре з Петровцох, Роберт Ерделї и Кристиян Медєши.

Тиж, уж традицийно, орґанизує Мемориялни турнир у столним тенису «Владимир Тимко» котри ма интерни характер, а попри промоцийох кнїжкох руских писательох з Горватскей, орґанизовало и стретуце зоз писателями и рецитаторами зоз Шиду.

У рамикох Подобовей колониї орґанизовани наступ драмскей секциї КУД-а «Яким Гарди» з Петровцох котри виведли дуодраму «Блїскаци жирячки малженства» з ґлумцами Ивану Колбас и Владимиром Дудашом, а у режиї Томислава Раца.

КУД Руснацох Осиєк у своїх можлївосцох намага ше жительом Осиєку и самим Руснацом з Осиєку и околїска понукнуц цо рижнороднєйши змисти, алє осипованє членства пре одход до иножемства, одход на школованє до других местох лєбо смертельни случаї, у велькей мири очежує тоти намаганя — наглашела предсидателька Балатинцова.

КУД Руснацох Осиєк ма уписаного 51-го члена, алє лєм 28 активних. Од тих 28 досц єстстарших котри лєбо презавжати на своїх роботних местох, лєбо пре хороти нє можу у подполносци витворйовац шицко потребне за даяки активнєйши ансамбл. Медзи младима, зацикавеносц обрацена на активносци здруженьох котри у можлївосци зробиц проєкти котри младим обезпечую пребуванє у страних жемох, та лоґичне же их таки програми вецей цикавя.

Понеже у наших културних и културно-уметнїцких дружтвох нєт плацених и професийно занятих, чежко провадзиц шицки предписаня котри приноши держава и обовязує здруженя на притримованє истих, та и з того боку очежана робота Дружтвох.

Предсидателька тиж наглашела же за потреби Дружтва купени 2 греячки, надоплнєло ше хлопске народне облєчиво з лайбиками, а жени, през етно секцию, за потреби женскей часци хорскей секциї, виробели прикраски за стилизоване облєчиво з елементами рускей култури.

Видрукована и брошура о роботи Подобовей колониї, а за потреби членох Дружтва одкупене и єдно количество кнїжкох автора Дюри Лїкара «Миклошевци под сримским нєбом», дзе на прейґ 440 боки и попри вецей од 2000 фотоґрафийох приказани жителє Миклошевцох през вецей ґенерациї, а през хижу (нумероване число хижи) у хторим тоти ґенерациї бивали.

Наглашене и добре сотруднїцтво прейґ Представительки рускей националней меншини Осєцко-бараньскей жупаниї зоз Националним Совитом Руснацох Сербиї, а то ше указало на Дравских габох дзе ше каждого року поволує єден руски ансамбл з Войводини и прейґ приходу малярох на Подобову колонию, як и зоз самим присуством представительох Националного совиту на манифестациї «Дравски габи». Наглашене и добре сотруднїцтво зоз Союзом Русинох РГ, дзе КУД Руснацох Осиєк член од самих початкох свойого снованя, а понеже у мандату предсидательки Союзу членїца КУД-а Руснацох Осиєк, Дубравка Рашлянин, Дружтво ма привилеґию же на манифестацийох вше присутна предсидателька Союзу.

У прешлим року на Округлим столє у Ораховици, котри орґанизовал Союз Русинох РГ, КУД Руснацох Осиєк мало вецей делеґатох, медзи котрима бул и тайомнїк Дружтва, Зденко Сивч, касирка Лела Дїтко, та член предсидательства, Мирослав Дїтко. Понеже мали нагоду слухац викладанє предсидателя Совиту за национални меншини РГ, Александра Толнауера, прешвечели ше же почежкосци у културним аматеризму буду вше векши, понеже предписаня о здруженьох административно вше обсяжнєйши, а членство нєдостаточно едуковане за аматерске водзенє здруженьох. Но и кед би було едукованше, вимага ше вельо часу за пополньованє рижних предписаньох и формох котри нїби предписала Европа, та вше менєй аматерох ма дзеку прилапиц ше такей роботи без надомиреня трошкох.

Звит з боку Скупштини прилапени у подполносци, а дискусиї ше водзели вецей у напряме злєпшованя стану просторийох у котрих Дружтво як о роботи котра одробена у 2015. року.

Предсидателька КУД-а Руснацох Осиєк предложела и план роботи за 2016. рок котри Скупштина у цалосци прилапела.

Финасийни звит, котри поднєсла касирка Лела Дїтко, указал же розполаганє з финансиями було осторожне и же ше нїґдзе нє потрошело вецей як заплановане.

Понеже ше Дружтво финансує у найвекшей часци з боку Совиту за национални маншини РГ, средства можлїве хасновац лєм так як Совит предписал и по програмох за котри Дружтво од нїх достало средства. З меншей часци, зоз по 2000 куни, роботу Дружтва подпомага и Город Осиєк, та Осиєцко-бараньска жупания, а тоти средства ше тиж можу потрошиц лєм за проєкти хтори Дружтво приявело и за хтори лєм з тей малей часци достало средства.

Шицки други финансийни видатки намирйовали ше з членарини Дружтва котра символична и нє обезпечує достаточне функционованє у случаю кед би други жридла пресушели.

Финансийни план котри предложени за 2016. рок, у найвекшей мири завиши од средствох котри ше достанє лєбо нє достанє по приявених проєктох, та у сущносци нєможлїве принєсц реални финансийни план.

Госци на Скупштини, попри члена Совиту за национални меншини Звонка Костелника и предсидательки Созюу Русинох РГ, Дубравки Рашлянин, та Представительки рускей националней меншини Осєцко-бараньскей жупаниї, Агнетки Балатинац, були и Михал и Владо Панковичово, свойочасово барз активни у КУД-у «Осиф Костелник» у Вуковаре, а нєшка ище вше активни кажди у месце пребуваня, Михал у Пишкуревцох, а Владо у Сиднею у Австралиї.

По законченей Скупштини отримане друженє Дружтва на котрим ше шпивали руски шпиванки, дзе затанцовали тоти хтори мали дзеку танцовац, а у розгварки єден час препровадзели гевти котри нє активни у секцийох Дружтва, алє су подпераюци члени и вше дзечнє приходза на шицки збуваня котри Дружтво орґанизує.

Агнетка Балатинац