ПЕТРОВЦИ - У орґанизациї Союзу Русинох РГ, КУД-а „Яким Гарди“ Петровци и Ради рускей националней меншини Општини Боґдановци у Етноґрафскей збирки у Петровцох отримана манифестация „Ноц музейох“ з нагоди 180. рочнїци приселєня Руснацох до Петровцох и Горватскей, 180 роки петровскей парохиї и 45 роки Новей думки, котра отримана 29. януара того року.
Предсидателька Союзу Русинох РГ привитала шицких нащивительох и учашнїкох манифестациї и наглашела же треба чувац шицко тото цо зме створели же бизме знали хто зме и одкаль зме. Паноцец Владимир Седлак потолковал виставу и вибудов петровскей парохиї, а редакторка Новей думки упознала присутних зоз видаваньом нашого часопису, а шпивацка ґрупа КУД-а „Яким Гарди“ одшпивала руски народни писнї у провадзеню Звонка Еделинского.
На тей уж традицийней манифестациї участвовали и други институциї култури: aрхиви, библиотеки, центри за културу, здруженя гражданох и други.
Тоту вельку акцию, хтору орґанизує уж по єденасти раз, розпочало Горватске музейне дружтво у сотруднїцтве зоз горватскима музеями у цилю популаризациї музейних змистох и приводзеня публики до музейних и етноґрафских просторох.
Орґанизаторе у Петровцох за нащивительох обезпечели цеплого чаю и вареного вина, а тиж так и пуканки, поґачи и череґи. Понад 80 нащивительох, медзи котрима були и представителє зоз културного, политичного и вирского живота, мали нагоду поопатрац нови постав нашей збирки, а тиж так и стретнуц ше зоз другима нащивителями, а поготов зоз младима.
Ноц музейох, до котрей уключена и збирка у Петровцох, отримує ше у вельочислених музейох, котри под час манифестациї задармо понукаю рижни програми од виставох, музичних концертох и презентованя ґастрономиї.
Понад сто горватских городох приключело ше до тей манифестациї, а нащивело ю понад 400 000 патрачох.
