МИКЛОШЕВЦИ - У Миклошевцох 15. новембра означена 165. рочнїца приселєня Руснацох до того места, а започала дополадня зоз Службу Божу у грекокатолїцкей церкви Рождества Пресвятей Богородици, а хтору служел о. Яким Симунович, парох миклошевски и викар славонско-сримски. Шветочна схадзка отримана на 13 годзин у Доме култури, дзе предсидатель Месного одбору Дюра Бики пречитал реферат о розвою валала од приселєня та по нєшка. У другей часци представена дзешата кнїжка Дюри Лїкара, миклошевского учителя у пензиї, „Миклошевци под сримским нєбом”.
О кнїжки–фотомоноґрафиї попри автора бешедовал рецензент о. Яким Симунович, а пречитана и рецензия др Оксани Тимко–Дїтко, професорки на Филозофским факултету у Заґребе, док предслово написал др Филип Шкилян. Авторови ше удало позберац обсяжни податки о цалокупним живоце у валалє през тот длугоки период: вирски, образовни, културни и привредни. Тиж так Лїкар призначел хронолоґийни приказ скоро шицких фамелийох за котрих пренашол податки през вецей ґенерациї. Кнїжка друкована двоязично, по руски и по горватским, та є на тот способ прилаплїва каждому читательови же би у нєй пренашол факти о прешлосци своїх предкох. Фотомоноґрафия „Миклошевци под сримским нєбом” ма 440 боки, вецей як 2000 фотоґрафиї особох и обєктох. Видаватель Рада Месного одбору Миклошевци. Друкованє материялно помогли: Вуковарско-сримска жупания, Горватска матка виселєнцох, Општини Томповци и Боґдановци, УГДДР ВСЖ, Рада рускей националней меншини Општини Томповци, а одредзене число фотомоноґрафиї скорей друкованя одкупели: Представитель рускей националней меншини Заґреб, КУД Руснацох Осиєк, Рада рускей националней меншини городу Вуковар, Союз Русинох Горватскей, Микола Голик и Златко Бики. Друкована є у 400 прикладнїкох и заведзена у каталоґу Националней и универзитетскей библиотеки у Заґребе.
Програму зоз музичнима точками надополнєли дует Нада Батакович – Леся Мудри, соло шпивачки Паула Поточки и Ивона Гнатко, як и хлопска шпивацка ґрупа КУД-а „Яким Ґарди”, а програму водзел Иван Лїкар.
Шветочну програму провадзели визначни госци з обидвох бокох Дунаю, медзи котрима жупан Вуковарско-сримски, Божо Ґалич, котри бул и покровитель означованя, народна посланїца у Скупштини Републики Сербиї, Олена Папуґа, член Совиту за национални меншини Републики Горватскей, Звонко Костелник, заменїк началнїка Општини Томповци, Здравко Звонарич, предсидателька Союзу Русинох РГ, Дубравка Рашлянин. Спред Националного Совиту Руснацох Сербиї присуствовали заменїк предсидателя Йовґен Мудри и предсидатель Вивершного одбору Желько Ковач, та секретарка Дружтва за руски язик, литературу и културу Ирина Папуґа з Нового Саду.
После програми у виронаучней сали отворена вистава старих фотоґрафийох зоз парастского живота, спорту, култури, облєчиво, алати и ручни роботи цо порихтали члени Здруженя женох.
Ксения Лїкар
