У Миклошевцох 30. и 31. авґуста 2014. року отримана 29. манифестация "Миклошевци 2014".
Манифестация започала всоботу у предвечарших годзинох з промоцию збирки поєзиї Штефана Гудака "Зайда за мирни сон". Модератор промоциї була Агнетка Балатинац, о кнїжки бешедовал Микола Шанта, одвичательни редактор, писнї зоз збирки рецитовали Паула Поточки, Иван Лїкар, Ксения Лїкар, Любица Гаргай и Агнетка Балатинац док женска шпивацйка ґрупа з Миклошевцох и хлопска шпивацка ґрупа з Петровцох одшпивали пригодни шпиванки. На концу слово мал автор, Штефан Гудак, и сам родом зоз Миклошевцох, котри ше у емотивним обрацаню патрачом задзековал на пририхтаней промоциї, а потим шицки вєдно, обидва шпивацки ґрупи, котрим ше, зоз своїм прекрасним гласом, приключел и о.Янко Колошняї котри бул у нащиви Миклошевцом а на служби я у Канади, и шицки нащивителє, цала виронаучна сала у котрй ше отримовала промоция, зашпивали нашу познату шпиванку "Хижочко стара", як дарунок авторови за здогадованє на Миклошевци.
Пригодни дарунки пририхтало КУД "Яким Ґовля" котре и одкупело Гудаково кнїжки котри були подзелєни нащивительом.
Потим ушлїдзело отверанє вистави подобових малюнкох з фундусу КУД Руснацох Осиєк з Подобових колонийох котри Дружтво орґанизаю у Альмашу. Виставу отворела предсидателька КУД Руснацох з Осиєку, Агнетка Балатинац, котра наьлашела значносц и тей файти творчосци при Руснацох а окреме наглашела потребу винаходзеня цикавих змистох за Руснацох котрих у Осиєку нєт вельо та тим важнєйше зачувац и прицагнуц каждого Руснака же би пестовал и очувал свой национални скарб.
На централней бини на отворени, у вечарших годзинох отримани здружени концерт КУД "Яким Ґовля" з Миклошевцох и КУД "Яким Гарди" з Петровцох.
Нєдзелова програма почала зоз службу Божу у грекоталїцкей церкви Рождества Пресвятей Богородици. Потим традицийно сцигли бициґлист з Руского Керестура котри каждого року вожа тоту руту под мотом" По драгох наших предкох".
Централна програма под назву "Поздрав ровнїни" почала на 15 годзин пополадню а наступели шлїдуюци дружтва: КУД Руснацох з Винковцох, КУД "Яким Гарди" з Петровцох, КУД Руснацох з Осиєку, КУД "Осиф КОстелник" з Вуковару, Дружтво Руснак з Петровцох, домашнї-КУД "Яким Ґовля",та госцуюци дружтва з Томповцох (горватске), зоз Старих Янковцох, та "Венера" з Вуковару.
Внєдзелю вечар отримани вечар рускей шпиванки дзе наступали соло, дуети и квартети а окрем шпивачох зоз Горватскей наступели и шпивачки зоз Войводини.
Манифестацию орґанизовало КУД "Яким Ґовля" под покровительством Совиту за национални меншини РГ та супокровительством жупана Вуковарско-сримскей жупаниї, Општини Томповци и Союзу Русинох РГ.
О шицким ше вецей годно пречитац у идуцим чишлє Новей думки.
