ЗАҐРЕБ - Всоботу, 24. октобра Руснацом у Заґребу була представена кнїжка композицийох Юлина Бучка «Лєм писня далєй будзе жиц», видаванє хторей у велькей мири оможлївел и Представитель Руснацох городу Заґребу мр. Ириней Мудри. Кратку програму за час хторей присутни могли ше упознац зоз животом и творчосцу миклошевского композитора Юлина Бучка, порихтали члени штирох руских дружтвох: КУД «Яким Ґовля» з Миклошевцох, КУД «Яким Гарди» и Дружтво «Руснак» зоз Петровцох и КУД Руснацох з Осиєку. На промоциї попри Руснацох зоз Заґребу, присуствовали и предсидателька Союзу Русинох Републики Горватскей Дубравка Рашлянин и член Совиту за национални меншини РГ Звонко Костелник.
На представяню кнїжки здружена оркестра дружтвох зоз Петровцох и Осиєку провадзела два шпиванки, «Дунаю, рико» и «Уцихнї шерцо», а шпивали їх Михал Голик з Петровцох и Леся Мудрого з Миклошевцох. Ивона Гнаткова з Вуковару одшпивала композицию «Червена ружичка», док Юлинов син Борис представел присутним шпиванку «Калїно моя», а дзивка Ана свою интерпретацию шпиванки «Била голубка». За конєц програми женска шпивацка ґрупа КУД «Яким Ґовля» з Миклошевцох одшпивала «Дує витрик», хтору порихтала Ана Бучкова.
После програми госци и домашнї предлужели друженє у приємней атмосфери, а од Бориса Бучкового дознаваме же представянє кнїжки, после Миклошевцох и Заґребу, заплановане и по других местох дзе жию Руснаци, насампредз у Осиєку и Петровцох.
