ЗАҐРЕБ - На поволанку Представителя рускей националней меншини Городу Заґребу, Иринея Мудрого, 21. новембра КУД „Яким Гарди” Петровци и КУД „Яким Ґовля” Миклошевци зоз фолклорним ансамблом, Женску шпивацку ґрупу и оркестром шицким домашнїм Заґребчаньом и госцом, у просторийох ресторану «КАЗАБЛАНКА», подаровали фолклорно-шпивацку лакотку руских писньох и танцох. Дружтва уж традицийно участвую на културним вечару на котрим презентую руску писню и танєц, а означую и Дзень Представителя рускей националней меншини Городу Заґребу.
Ансамбл зоз Миклошевцох одтанцовал „Горнїцки танєц” и „На тарки”, а шпивацка ґрупа одшпивала даскельо крачунски и народни писнї, а ансамбл зоз Петровцох одтанцовал два танци, „Танцовала би я танєц, та за танцом” и „Три гвиздочки на нєбе”
Програма розпочала зоз Гимну Републики Горватскей и Святочну писню Руснацох, а после ше нащивительом и госцом обрацел и привитал: Представитель Рускей националней меншини Городу Заґребу пан Ириней Мудри.
Медзи домашнїма на вечару були и представителє других националних меншинох Городу Заґребу – мадярска, болгарска, русийска и други.
За таки чаривни вечар рускей писнї и танцу постарали ше гудаци зоз Руского Керестура котри нєпреривно грали же би ше танцоше нє мали кеди одпочинуц.
Понад сто пейдзешат присутних домашнїих и госцох нє преставали вешельом до позно вноци, а розгварки и бешеди нїґда конца медзи людзми зоз наших местох. Звичайно же кед треба исц дому же ше нїкому нє идзе, алє остало на тим же ше нарок, кед Бог да, знова стретнєме.
