РУСКИ КЕРЕСТУР – Нєсподзивано, нєшка вноци у 53. року живота умар наш визначни музичар Юлиян Рамач Чамо, без котрого остатнї даскельо децениї нє могло задумац музични живот Руснацох, як и шицки нашо музични фестивали, окреме „Червену ружу” и „Ружову заградку”, як и музичну роботу у Доме култури Руски Керестур, дзе бул заняти 30 роки.
Як стоодстотни слухиста, Юлиян Рамач грал на вецей инструментох, компоновал, аранжовал, руководзел з оркестрами, шпивацкима ґрупами дзецох, младих и старших, соло-шпивачами, дириґовал з хором, бул корепетитор, мож повесц же на нїм стала скоро цала музична робота керестурского Дому култури, та з тим и Фестивалу „Червена ружа”.
Як позарядови фаховец у музики свойо музичне знанє и искуство нєсебично преношел и на младших, так же вишколовал велї ґенерациї нєшкайших музичарох, нє лєм у Керестуре, алє и у КУД по местох дзе жию Руснаци.
Шлєбодно мож повесц же Юлиян Рамач Чамо спада до плеяди велїканох нашей музики, як цо то браца Тимково, Яким Сивч, Витомир Бодянєц…, котри у велїм задлужели руску музику, хтора з його нєсподзивану шмерцу останє худобнєйша.
Праве нєшка знова мал стануц опрез оркестрох, шпивацких ґрупох и соло-шпивачох на „Червеней ружи”, котру барз любел и хторей ше, як и шицкому другому придавал цали и нєсебично, з окреме вредну роботу.
Юлиян Рамач Чамо будзе поховани на ютре, на соботу, 25. юния на 14 годзин на керестурским теметове, а цала його фамелия жила з музику и за собу зохабел супругу, два дзивки и жеца, як и свою найблїзшу фамелию.
Комеморативна схадзка Юлиянови Рамачови будзе на ютре, соботу, на 12 годзин у Велькей сали Дому култури Руски Керестур.
Най му будзе вична памят!
