ЗАҐРТЕБ - У орґанизациї Союзу Русинох РГ и КПД «Рускиня и Руснак» зоз Заґребу, 20. децембра 2015. року заґребскей ше публики представела векшина наших Дружтвох зоз своїм културним аматеризмом.
Предсидателька домашнього Дружтва, Олґица Мудри, привитала своїх госцох и шицких патрачох, а вец ше публики шором, зоз кратким словом и порихтану програму представяли, перше домашнє Дружтво, а потим КУД Русинох зоз Винковцох, хторе одшпивало два писнї зоз свойого репертоару, КУД «Осиф Косетлник» зоз порихтаним наступом мишаного хору и солистичним наступом дзецинскей шпивачки Клари Миклош, КУД Русинох Осиєку зоз мишаним хором и танєчну секцию, КУД «Яким Гарди» зоз Петровцох зоз танєчну секцию, КУД Руснацох Цвелфериї зоз Райового Села представел ше зоз свою гудацку и шпивацку поставу и на концу розшпиване Дружтво Русинох и Українцох «Калїна» зоз Риєки. Була то по перши раз на таки сопсоб обдумана, богата и пополнєта програма, хтора порихтана зоз финансийну потримовку Совиту за национални меншини РГ.
Остава ше наздавац же таки способ стретаня наших Дружтвох достанє традицийну форму и же и того року отримаме други по шоре «Крачух у Заґребе».
Вера Павлович
