ПРЕШЛОРОЧНИ ПОБИДНЇК ОБРАНЄЛ НАСЛОВ
У орґанизациї КУД-а Руснацох Осиєк и Представнїци рускей националней меншини Осиєцко-бараньскей жупаниї, Агнетки Балатинац 12. октобра 2019. року у просторийох Дружтва, отримани Мемориялни турнир у столним тенису «Владимир Тимко». Турнир интерного характеру, як здогадованє на покoйного члена и утемелїтеля Дружтва, Владимра Тимка, котри нєсподзивано умар 2008. року. Присутних привитал предсидатель КУД Руснацох Осиєк, Оґнєн Здравкович и пожадал успишни Турнир.
Бавело осем бавячох: Владимир Еделински, Томислав Мишир, Зденко Сивч, Ромко Гаргай, Тихана Попиняч, Оґнєн Здравкович, Татяна и Гелена Тимко (дзивки покойного Владимира). Перше место освоєл Оґнєн Здравкович та з тим обранєл наслов од влонї, друге место освоєл Ромко Гаргай а треца була Татяна Тимко. Дружтво пририхтало скромни награди побиднїком котри уручела Славица Тимко, ґдовица покойного Владимира.
По законченим змаганю, присутни бавяче и навияче, їх коло 20, иншак шицки члени КУД-а Руснацох Осиєк, предлужели друженє при скромней закуски и зоз рускима шпиванками хтори Предсидатель Здравкович попровадзел на гармоники.
Агнетка Балатинац
Фото: А.Балатинац
- З лїва на право: Ромко Гаргай (2. место) Татяна Тимко (3. место) и Оґнєн Здравкович (1. место)
- Навияче и бавяче
А.Балатинац
