ВИНКОВЦИ - КУД Русинох зоз Винковцох, 18. фебруара того року, у просторийох Городскей библиотеки у Винковцох отримал першу промоцию документарней виглєдовацкей кнїжки Миколи Папа «Страданє Руснацох у Отечественей войни 1991. -92. »
Привитне слово у мено Дружтва отримала Мелания Пап, предсидателька КУД Русинох зоз Винковцох, а вец слово препущела модераторови збуваня. Модератор промоциї бул др Томислав Мишир, хтори потим слово дал Иванови Ґрчичови, рецензентови тей двоязичней руско-горватскей кнїжки, а хтори под час Отечественей войни мал заповидну улогу у сектору у хторим ше борели нашо людзе.
Томислав Мишир наглашел значносц такей виглєдовацкей роботи хтора, спрам словох автора, тирвала полни дзешец роки. До подполних податкох нє було лєгко дойсц и нє значи же список забитих закончени, алє и тото спознанє може буц перши крочай за виглєдованє историйних обставинох и одкриванє велькей жертви хтору нашо людзе на тим просторе поднєсли. Юрай Бичанич читал мена забитих у Отечественей войни, а медзи нїма значне число цивилох, страших людзох и женох, хтори мучени и забити у аґресиї на Републику Горватску и за тото злодїйство ище нїхто нє одвитовал. Медзи забитима находза ше мена родичох и блїзкей фамелиї учашнїкох промоциї.
На концу, технїчни податки о сасмей кнїжка дала главна и одвичательна редакторка Вера Павлович, хтора надпомла же кнїжка друкована зоз финансийну потримовку Совиту за национални меншини РГ, у хторим формату кнїжка друкована, дзе є друкована, дала даскельо слова о лекторох, рамикох, тиражу, компютерским обробку и других технїчних податкох.
У публики були члени КУД Русинох зоз Винковцох, предсидателька Союзу Русинох РГ Дубравка Рашлянин, представителє Координациї рускей националней меншини ВСЖ и други зацикавени гражданє, а шицко тото провадзела и Винковска телевизия хтора у своїм мултиетнїчним маґазину «Обєктив» емитовала прилог зоз того збуваня.
Вера Павлович
