ОСИЄК -
У орґанизациї КУД-а Руснацох Осиєк а з финацийну потримовку Совиту за национални меншини РГ, всоботу, 11. новембра 2023. року, отримана манифестация «Видзене з камеру».
На конкурс, хтори тирвал єден тидзень, посилало ше, максимално три авторски фотоґрафиї на хторих Осиєк, лєбо природа коло Осиєку, хтори ше потим шифрирали а вец их жири препатрал и оценьовал. По одлученю предсидательства, од єдного автора могла буц вибрана лєм єдна фотоґрафия за награду а право участвованя маю лєм члени КУД-а Руснацох Осиєк. На конкурс присцигли фотоґрафиї шесцерих авторкох и авторох. Змагали ше: Гелена Шобан, Мирко Рибич, Мирослав Мудри, Дубравка Рашлянин, Ромко Гаргай и Агнетка Балатинац.
Виберало ше фотоґрафиї за 1.,2. и 3. место. Жири творели: Ясминка Ванчура, Татяна Тимко и Иґор Рашлянин.
Жири одлучел же 3. место освоєла шифра под хтору ше находзела фотоґрафия Ромка Гаргая, 2. место фотоґрафия Мирка Рибича а 1. место припадло Мирославови Мудри.
Награди побиднїком дозелєла предсидателька жирия Ясминка Ванчура.
Док жири препатрал фотоґрафиї, присутни члени Дружтва розправяли о активносцох хтори шлїдза по конєц рока та планох за роботу Дружтва у наступним року.
По дозелєних наградох, члени Дружтва предлужели друженє у приємним амбиєнту Обер Ланч Бару, а атмосферу уподполньовала наша шпиванка.
Агнетка Балатинац
